የቅባት እህሎችን ምርታማነት ለማሳደግና የኢንዱስትሪዎችን ፍላጎት ለማሟላት ያለመ ሀገር አቀፍ ኮንፈረንስ ተካሄደ፡፡

በአሁኑ ወቅት በሀገር ውስጥ የቅባት እህሎችን በዋና ግብአትነት የሚጠቀሙ ኢንዱስትሪዎች እያደጉ በመምጣታቸው የቅባት እህሎች ተፈላጊነት እያደገ መጥቷል፡፡ በአንጻሩ የሚመረተው ምርት የኢንዱስትሪዎችን ፍላጎት ለማሟላት የሚችልበት ደረጃ ላይ አይደለም፡፡ ይህን ክፍተት ለመሙላት ያለመ ሀገር አቀፍ ኮንፈረስን በባህር ዳር ከተማ ተካሂዷል፡፡ በኮንፈረንሱ መግቢያ ላይ በግብርና ሚኒስቴር የግብርና ኤክስቴንሽን ዋና ዳይሬክተር አቶ ገርማሜ ጋሩማ በሀገር አቀፍ ደረጃ ያለው የቅባት እህሎች ፍላጎት ለማሟላት ዘመናዊ ቴክኖሎጅዎች በመጠቀም ማሳደግ እንደሚገባ ገልጸው በተለይ አኩሪ አተርን በስፋት በማምረት የኢንዱስትሪ ፍላጎቱን ማሳደግና ተረፈ ምርቱን ለእንስሳት መኖነት በመጠቀም የእንስሳት ዘርፉን ምርታማነት ማሳደግ ይቻላል ብለዋል፡፡ የአማራ ክልል ግብርና ቢሮ ዋና ኃላፊ ዶ/ር መለስ መኮንን በበኩላቸው ባለፉት 10 አመታት የምግብ ሰብሎች ምርታማነት በእጥፍ ያደገ ቢሆንም የቅባት እህሎች ምርታማነት ግን በሚፈለገው ልክ ትኩረት ሳይሰጠው ቆይቷል ብለዋል፡፡

በክልሉ ትልልቅ የዘይት ፋብሪካዎች በመገንባታቸው ከፍተኛ የሆነ የቅባት እህሎች ፍላጎት ያለ በመሆኑ ነባራዊ ሁኔታው በቅባት እህሎች ላይ አተኩረን እንድንሰራ ያስገድዳል ያሉት ዶ/ር መለስ ያለውን የቅባት እህሎች ፍላጎት ለማሟላት በግብርናው ዘርፍ የምንሰራ አካላት ተገቢውን ቅንጅት ፈጥረን ልንሰራ ይገባል ብለዋል፡፡ በአማራ ክልል በ2013/2014 የምርት ዘመን 652 ሺህ ሄክታር መሬት በቅባት እህሎች እንዲሸፈን እቅድ ተይዞ በየደረጃው ያሉ የተቋሙ አመራሮችና ባለሙያዎች እቅዱን ለማሳካት እየሰሩ መሆናቸውንም ዶ/ር መለስ ተናግረዋል፡፡ የአማራ ግብርና ምርምር ኢንስቲትዩት ዋና ዳይሬክተር ዶ/ር ጥላዬ ተክለወልድ ደግሞ ምርምር ኢንስቲትዩቱ የተሻለ ምርት የሚሰጡ የቅባት እህሎች ዝርያዎችን የማፍለቅ፣ የማላመድና የማስተዋወቅ እና የተሻሻሉ የአመራረት ስልቶችን የማስተዋወቅ ስራ እየሰራ መሆኑን ገልጸው ዘርፉን ለማሳደግ ችግር ፈች የሆነ ከፌደራል እስከ ታችኛው መዋቅር ድረስ ያሉ አካላት ምን መስራት እንዳላቸው በውል የለየ እቅድ ተዘጋጅቶ ወደ ስራ መገባት ይኖርበታል ብለዋል፡፡ በኮንፈረንሱ በዘርፉ ያለውን የቅባት እህሎች እጥረት ለመቅረፍ ያስችላሉ ተብለው የታሰቡ ጥናታዊ ጽሁፎች በተለያዩ ተመራማሪዎች እና ባለድርሻ አካላት ቀርበው ውይይት ተደርጎባቸዋል፡፡ መካናይዜሽንን በስፋት በመጠቀም፣ የተሻሻሉ የቅባት እህል ዝርያዎችን በመጠቀም፣ ከመኸር የምርት ስራው በተጨማሪ የቅባት እህሎችን በመስኖ በማልማት፣ በየደረጃው ያሉ ባለድርሻ አካላት ተቀናጅተው በመስራት፣ አምራቾችና ኢንዱስትሪዎች ተግባብተው እንዲሰሩ በማድረግ፣ በዘርፉ ያሉ ቢሮክራሲያዊ ውጣ ውረዶችን በማስወገድ በኢንዱስትሪዎች ዘንድ ያለውን የቅባት እህሎች ከፍተኛ ፍላጎት ማሟላት እንደሚቻል በኮንፈረንሱ ተሳታፊዎች ተገልጿል፡፡ በኮንፈረንሱ በክልልና በፌደራል ደረጃ የሚገኙ ባለድርሸ አካላት፣ ዩኒቨርሲቲዎች፣ የዘይት ፋብረካዎች ተወካዮች እና ሌሎች የሚመለከታቸው አጋር አካላት የተሳተፉ ሲሆን ኮንፈረንሱን የኢትዮጵያ ግብርና ምርምር ካውንስል፣ ግብርና ሚኒስቴር፣ የአማራ ክልል ግብርና ቢሮ፣ የአማራ ግብርና ምርምር ኢንስቲትዩቱና ባህር ዳር ዩኒቨርሲቲ ኮንፈረንሱን በጋራ አዘጋጅተውታል፡፡

የአማራ ግብርና ምርምር ኢንስቲትዩት በአማራ ክልል ከሚገኙ ዩኒቨርሲቲዎች ጋር በትብብር ለመስራት የሚያስችለውን ስምምነት ተፈራረመ፡፡

የአማራ ግብርና ምርምር ኢንስቲትዩት ዋና ዳይሬክተር ዶ/ር ጥላየ ተክለወልድ በአማራ ክልል ከሚገኙ የፌደራል የመንግስት ዩኒቨርሲቲዎች ጋር ከዚህ በፊት በ2005ዓ.ም ለ5 አመታት የሚቆይና በጋራ ለመስራት የሚያስችል የመግባቢያ ሰነድ ተፈርሞ ተግባራዊ ሲሆን ቆይቷል ብለዋል፡፡ ይሁን እንጅ የስምምነቱ ጊዜ በማለቁ፣ አዳዲስ የፌደራል ዩኒቨርሲዎች በክልሉ በመከፈታቸው እና አንዳንድ አንቀጾችን ማሻሻል አስፈላጊ ሆኖ በመገኘቱ በክልሉ የሚገኙ 10 የፌደራል ዩኒቨርሲቲዎች በተገኙበት በላሊበላ ከተማ በጋራ ለመስራት የሚያስችል የመግባቢያ ሰነድ ተፈርሟል ብለዋል፡፡ መግባቢያ ሰነዱ ምርምር ኢንስቲትዩቱና ዩኒቨርሲዎቹ በትምህርት፣ በምርምርና ማህበረሰብ አገልግሎት ዘርፎች ተቀናጅተው ለመስራት የሚያግዝ መሆኑን የገለጹት ዶ/ር ጥላየ በጋራ የምርምር ስራዎች ለማቀድ፣ ለመገምገም እና ያሉ ሀብቶችን በጋራ ጥቅም ላይ በማዋል ክልሉን ለመጥቀም እንደሚያግዝ ተናግረዋል፡፡

ቪዲዮን ይመልከቱ

Please click here to watch this video